“హిరణ్యవర్ణాం హరిణీం” – శ్రీ మహాలక్ష్మిని ఆహ్వానించే పదిహేను ఋక్కుల శ్రీసూక్తం; దేవీ పూజలో ఉపచార మంత్రాలు.
సూక్తం
హిరణ్యవర్ణాం హరిణీం సువర్ణరజతస్రజామ్ । చంద్రాం హిరణ్మయీం లక్ష్మీం జాతవేదో మ ఆవహ ॥ 1 ॥
తాం మ ఆవహ జాతవేదో లక్ష్మీమనపగామినీమ్ । యస్యాం హిరణ్యం విందేయం గామశ్వం పురుషానహమ్ ॥ 2 ॥
అశ్వపూర్వాం రథమధ్యాం హస్తినాదప్రబోధినీమ్ । శ్రియం దేవీముపహ్వయే శ్రీర్మా దేవీ జుషతామ్ ॥ 3 ॥
కాం సోస్మితాం హిరణ్యప్రాకారామార్ద్రాం జ్వలంతీం తృప్తాం తర్పయంతీమ్ । పద్మే స్థితాం పద్మవర్ణాం తామిహోపహ్వయే శ్రియమ్ ॥ 4 ॥
చంద్రాం ప్రభాసాం యశసా జ్వలంతీం శ్రియం లోకే దేవజుష్టాముదారామ్ । తాం పద్మినీమీం శరణమహం ప్రపద్యేఽలక్ష్మీర్మే నశ్యతాం త్వాం వృణే ॥ 5 ॥
ఆదిత్యవర్ణే తపసోఽధిజాతో వనస్పతిస్తవ వృక్షోఽథ బిల్వః । తస్య ఫలాని తపసా నుదంతు మాయాంతరాయాశ్చ బాహ్యా అలక్ష్మీః ॥ 6 ॥
ఉపైతు మాం దేవసఖః కీర్తిశ్చ మణినా సహ । ప్రాదుర్భూతోఽస్మి రాష్ట్రేఽస్మిన్ కీర్తిమృద్ధిం దదాతు మే ॥ 7 ॥
క్షుత్పిపాసామలాం జ్యేష్ఠామలక్ష్మీం నాశయామ్యహమ్ । అభూతిమసమృద్ధిం చ సర్వాం నిర్ణుద మే గృహాత్ ॥ 8 ॥
గంధద్వారాం దురాధర్షాం నిత్యపుష్టాం కరీషిణీమ్ । ఈశ్వరీగ్ం సర్వభూతానాం తామిహోపహ్వయే శ్రియమ్ ॥ 9 ॥
మనసః కామమాకూతిం వాచః సత్యమశీమహి । పశూనాం రూపమన్నస్య మయి శ్రీః శ్రయతాం యశః ॥ 10 ॥
కర్దమేన ప్రజాభూతా మయి సంభవ కర్దమ । శ్రియం వాసయ మే కులే మాతరం పద్మమాలినీమ్ ॥ 11 ॥
ఆపః సృజంతు స్నిగ్ధాని చిక్లీత వస మే గృహే । ని చ దేవీం మాతరం శ్రియం వాసయ మే కులే ॥ 12 ॥
ఆర్ద్రాం పుష్కరిణీం పుష్టిం పింగళాం పద్మమాలినీమ్ । చంద్రాం హిరణ్మయీం లక్ష్మీం జాతవేదో మ ఆవహ ॥ 13 ॥
ఆర్ద్రాం యః కరిణీం యష్టిం సువర్ణాం హేమమాలినీమ్ । సూర్యాం హిరణ్మయీం లక్ష్మీం జాతవేదో మ ఆవహ ॥ 14 ॥
తాం మ ఆవహ జాతవేదో లక్ష్మీమనపగామినీమ్ । యస్యాం హిరణ్యం ప్రభూతం గావో దాస్యోఽశ్వాన్ విందేయం పురుషానహమ్ ॥ 15 ॥
యః శుచిః ప్రయతో భూత్వా జుహుయాదాజ్యమన్వహమ్ । సూక్తం పంచదశర్చం చ శ్రీకామః సతతం జపేత్ ॥
మహాదేవ్యై చ విద్మహే విష్ణుపత్న్యై చ ధీమహి । తన్నో లక్ష్మీః ప్రచోదయాత్ ॥
ఓం శాంతిః శాంతిః శాంతిః ॥
వేదమంత్రాలను స్వరంతో (ఉదాత్త, అనుదాత్త, స్వరిత) గురుముఖంగా నేర్చుకొని పఠించాలి. ఇక్కడ స్వర చిహ్నాలు లేకుండా పాఠం మాత్రమే ఇవ్వబడింది – పారాయణకు సహాయంగా.

